أكبر مخاوفك

أكتر حاجة انت خايف تعملها وبتهرب منها باستمرار
ممكن تكون هي أكتر حاجة انت محتاج تعملها في حياتك
أكتر أمنيات انت بتحلم بيها ونفسك تحققها بس حاسسها مستحيلة
مش مانعك عنها غير شوية خطوات انت خايف تاخدها وعشت طول عمرك تبتكر حيل عشان تتجنبها
عمري ما اتطورت في حياتي ولا اتعلمت حاجة عليها القيمة وأنا ماشي جنب الحيط
بس كل يوم بتعلم حاجة جديدة وبقطع أميال في الوعي ... وأنا بمشي فوق الحيط أو أعبر من خلاله
ممكن تعيش في أمان واستقرار شوية وانت بتنفذ البرنامج ال قالولك عليه الحقيقة
بس مش ممكن تذوق الحياة الحقيقية من غير شيء من المخاطرة والمغامرة والمواجهة مع ذاتك
كل أما بحس بخوف غير منطقي من أشياء مش مستاهلة ... بعتبرها إشارة إن في خطوة جديدة محتاج آخدها ... وأرمي نفسي في المجهول مرة تانية ... وأطلع برا قوقعة فكرية وشعورية ضيقة كنت حابس نفسي فيها وشايف الكون من خلالها

الشجاعة مش انك ترمي نفسك في التهلكة بدون حسبان ... لكنها القدرة على انك تكون حقيقي مع نفسك وتعبر عن رغبة روحك في الحياة والحب والاتساع من خلال جسمك

وفي كل لحظة في ايدك تسوف وتأجل وتغلوش على مواجهة مخاوفك ... وتستنى ملاك ينزل عليك بالحلول السحرية يوما ما وتشغل نفسك بالكنافة بالمانجا
أو
تقرر هنا ودلوقتي مواجهة أكتر حاجة انت عارف انك محتاج تعملها وتاخد خطوة بجسمك في اتجاهها ... وتنفذها ... رغم الخوف والقلق والمقاومة

هو ده المسار والطريق الوحيد ال هتقدر تتطور وتتوسع وتستمتع من خلاله
وتبتدي تشوف روحك بتتجسد على حقيقتها

#مسار_الحرية

Photo by
@ghareebphotography_studio