إذا لم تثق بالناس
Apr 12, 2019"إذا لم تثق بالناس ... لا يعودون أهلا للثقة"
من خلال التعامل مع مختلف أنواع الناس كل يوم ومساعدتهم على تطوير نفسهم، اكتشفت ان من أقوى العوامل الـ بتساعد أي شخص على التطور وأنا كمان بستمتع بتطبيقها هي "الثقة". والحقيقة مش عارف الثقة دي جاية منين بس عارف انها موجودة بالفطرة. طالما حد حضر لي جلسة أو كورس بكون كأني شايف أقوى نقطة فيه وعارف انه يقدر يعمل أي حاجة هو عايزها وبتعامل معاه من هذا المنطلق بسلاسة. وبعد فترة لما يحصل له تغيير للأفضل وينبسط ويتفاجئ، أنا كمان بكون مبسوط له جدا ولنفسي بس مش متفاجئ ... لأني شايف من الأول هو قادر يعمل ايه وكل حاجة كانت عائق بالنسبة له هي مجرد أوهام في عقله.
الثقة صفة جميلة جدا ومريحة ... ولا تعني بالضرورة انك تثق في أي شخص انه يقدر يقوم بوظيفة معينة مثلا وتديهاله وانت شايف علامات بتقول انه مش كفء ليها، لكن الثقة بالخير الـ جوا الناس والفطرة النقية الـ اتولدوا عليها، وده بيديهم قوة غير عادية! أو بيفكرهم أصلا بالقوة الحقيقية الموجودة جواهم.
لو بطلت تثق في الناس وأصبح التوقع بتاعك باستمرار انهم ضعفاء او خونة او مش هيعرفوا يقوموا باللازم، ده الـ هيحصل فعلا وهترجع تشتكي منهم. وده بيبان أوي في التربية، عدم ثقة الأهل في أبنائهم وخوفهم الزائد عليهم الـ بيتحول لرغبة في التحكم والعنف أحيانا، هو ده السبب الرئيسي لعدم ثقة الأبناء في أنفسهم لحد ما يكبروا. وفي المقابل، الأب والأم الواثقين من أبنائهم أو القائد الواثق من موظفيه أو المعلم الواثق من طلابه وبيعلمهم ويرشدهم باستمرار بحب ورفق وحزم أحيانا -لكن بدون إجبار وتدخل- بتكون نتيجة ده ناس واثقة في نفسها حقيقي ومجرد وجودهم بيكون ملهم ومؤثر لكل حد حواليهم.
"الولادة … ثم الرعاية
امتلاك دون تملُّك
فعل دون توقُّع
قيادة دون تحكُّم
ذلك هو الخير الأسمى"
لاوتسو
والجدير بالذكر ان ثقة الشخص في الناس مش بيحصل غير لما يكون الشخص في الأساس واثق من نفسه ثقة حقيقية، مش ثقة هشة نابعة من خوف أو معتقدات زائفة ... هنكمل الكلام في بوست لاحق ...
-
صاحبة الصورة Sophie Wahdan
شكرا للكل الناس الـ بعتت صور 
هكرر ده كل فترة 
