الأحلام وتفسيرها 2

في ناس كتير بتقول "أنا مش بحلم خالص طول م أنا نايم" وده مش حقيقي أوي. كلنا كبني آدمين بنحلم واحنا نايمين بنسبة أو بأخرى، لكن أشكال الأحلام بتختلف وادراكنا ليها بيختلف. في مراحل مختلفة للنوم وفي مرحلة النوم العميق أوي أو بعد يوم مرهق ممكن الشخص يكون عقله الواعي مجهد جدا انه يفتكر تفاصيل أي حلم شافه وهو نايم، لكن ده مش معناه بالضرورة إن هو مش بيحلم، كل الفكرة إن في ناس عندها قدرة أكتر على ملاحظة أحلامها وتذكرها وده مش ميزة ولا عيب هو مجرد اختلاف بين الناس وممكن جدا يحصل فيه تغير مع الزمن ومع اختلاف وعي الشخص وعاداته اليومية. وزي ما ذكرنا في المقال الـ فات إن الأحلام معظمها إعادة تمثيل وتعبير لا واعي لكل حاجة بنفكر وبنشعر بيها واحنا صاحيين، فطبيعي إن كل بني آدم يكون بيحلم.

الكوابيس

من أكتر الحاجات المزعجة ان شخص يكون في "كابوس" أو حلم مزعج. الكابوس أو الحلم المزعج هو تجسيد لمخاوف الشخص بشكل مضاعف وواضح، الشخص بيكون في حالة ضعف ونفس المخاوف الموجودة عنده أثناء يومه بتظهر بشكل أو بآخر أثناء النوم، وبتكون مؤلمة ومرهقة جدا لأن الشخص بيكون تحت تأثير خوفه بالكامل ومصدق إن الـ بيحصل ده حقيقي ومش مدرك إنه حلم، وبالتالي بيتفاعل بشكل لا واعي مع الأحداث المخيفة ويهرب منها ويقاومها ويحاول يتجنبها لكن كل ده بيديها قوة أكبر وبتستمر المعاناة دي لحد ما يصحى من النوم ويدرك إن كل ده كان مجرد حلم.

الكوابيس ليها أسباب كتير أهمها هي المخاوف العميقة المسيطرة على الشخص في حياته، ودي بتساعد في علاجها تقنيات كتير في التحرر من المخاوف وإن الشخص يكون واعي وبيمارس التأمل وأسلوب حياة إيجابي بشكل عام. وفي أسباب تافهة لكن بتؤثر جدا وممكن تسبب كوابيس مش لطيفة زي إنك تكون نايم بردان ومش متغطي كويس والإحساس بالبرد ده هيفضل يترجم في الحلم بأشكال مختلفة لغاية ما تصحى أو حد يغطيك! وانك تكون واكل أكلة ثقيلة وتنام بعدها أكيد ده هيأثر ع التنفس وبالتالي مش هتكون مرتاح وهتفضل مخنوق طول النوم وده هيتجلى في أحلامك. وكمان وجود أصوات معينة زي دوشة حواليك أو هدوء أو ناس بتتكلم أو موسيقى كل ده هيأثر في شكل نومك وأحلامك ونسبة ونوع التأثير هتفرق من شخص لآخر.

التحكم بالأحلام "lucid dreaming"

ده بقى قصة كبيرة وممتعة ويتكتب فيها مقالات وكتب. جربت قبل كده وانت بتحلم فجأة تكتشف انك نايم وبتحلم وتبدأ تغير في الحلم وتشكل الأحلام على مزاجك؟ جربت تصحى وتنام تكمل نفس الحلم الـ كنت بتحلمه على مزاجك؟ جربت تكون في حلم مزعج وانت عارف ده وجزء منك بيحاول يصحى بس مش قادر؟

التحكم في الأحلام من المواضيع الممتعة بالنسبة لي. في ناس كتير حصل معاها الموضوع مرة أو أكتر بالصدفة، وفي ناس اتدربت عليه وأصبحت بتعمله بإرادتها، وفي ناس أكيد متعرفش ان ده حاجة ممكنة. التحكم بالأحلام إلى جانب كونه حاجة ممتعة لكن هو ليه فوايد كمان. أكتر وقت بنكون في حالة "لا وعي" هو أثناء النوم، العقل الواعي بيكون نايم وشبه مغيب تماما. تخيل ان انت في أكتر وقت "لا واعي" يكون عندك وعي وتقدر تختار الصور الـ تشوفها في حلمك وتلعب بيها! ده معناه إن وعيك عالي نسبيا وبالتالي ده ممكن يساعدك بشكل كبير على اليقظة من الحلم الكبير الـ احنا موجودين فيه دلوقتي وأنا وانت جزء منه ... الكلمات الـ انت شايفها والصوت الـ انت سامعه وكل حاجة حواليك حتى أنا شخصيا جزء من حلمك .. زي مانت بالظبت جزء من حلمي .. واحنا بنتواصل دلوقتي من غير ما نتواصل ... مين قال لك ان انت صاحي دلوقتي؟؟ تضمن منين انك مش نايم وبتحلم؟؟ ما انت أثناء الحلم بتكون مصدقه تماما ومصدق انه واقع وحاسس بيه بحواسك الخمسة؟؟ تأمل في الفكرة شوية

باختصار التحكم في الأحلام هو أحد الوسائل لرفع الوعي واليقظة من الحلم الكبير، زي مانت بتكون نايم وانت نايم بتحلم انك بتصحى بس انت في الحقيقة لسة نايم، ممكن تكون دلوقتي لسة نايم وفاكر نفسك صاحي ... وممكن نكون كلنا شخصيات كرتونية في حلم شخص نايم ...

وزي ما كتير من الأحلام ممكن تكون أفكار عشوائية وورغبات ومخاوف مكررة، بعض الأحلام بتكون أعمق من كده بشوية، وده الـ بنسميه "رؤية". وده عبارة رسالة واضحة وغريبة بتيجي للشخص في الغالب في وقت غير متوقع، الرسالة دي بتجيله من الكون "أو من الملائكة أو من الإله أو من كائنات علوية" المهم انها بتيجي من مصدر غامض وبتكون عشان ترشدك في تحدي معين بتواجهه أو بتوريك حاجة انت محتاج تعملها. شكل الرؤية والصور الـ فيها مش مهم أوي لأن الكيان الـ بيبعتلك الرسالة دي بيخاطب عقلك اللاواعي من خلال رموز يقدر يفهمها، يعني لو نفس الرسالة مثلا ونفس الرؤية لشخصين هتترجم لكل شخص بطريقة مختلفة حسب عقله، لكن العبرة في الإحساس المهيب والغامض الـ بتحسه وفي حاجة جواك أعمق من العقل بتقولك ان دي "رسالة أو رؤية" بترشدك في طريقك.

في الآخر خليني أقول إن موضوع الأحلام جميل وظريف وبيكشف لنا حاجات كتير عن نفسا لكنه مش بالأهمية الكبرى الـ بعض الناس عايشة فيها! يعني مش محتاج تشغل بالك أوي وتفسر كل حلم يجيلك لأن ده هيدخلك في مزيد من الأوهام والأحلام زي ما ناس كتير أعرفهم بيفضلوا يفكروا في الحاجة كتير بقصد لحد ما يحلموا بيها وبعدين يوهموا نفسهم تاني إن دي رسالة سماوية. تاني بقول مفيش حاجة اسمها تفسير عام للأحلام وخصوصا الرؤى لأن دي حاجة شخصية جدا جيالك انت لسبب ممكن تدركه دلوقتي أو بعدين وأي حد هيفسرلك هو هيفسر من منظوره وخلفيته هو وده في الغالب مالهوش علاقة بيك. الرؤية أو الرسالة دي مش بتيجي لشخص عنده رغبة فيها أو مستنيها بشده، ومش محتاج تعمل أي حاجة عشان ده يحصلك وهو أصلا مش هدف تسعى ليه لكنه مجرد رسالة أخرى في طريقك بترشدك في رحلة ارتقاءك لما تكون مستعد تستقبلها. متشغلش بالك أوي بالأحلام واشغل بالك بتطوير نفسك وجسمك وتعيش حياتك بانسجام وصحة وتوازن.

حاولت أغطي معظم التساؤلات عن الأحلام وأوضح مفاهيم خاطئة كتير لكن عارف إن الموضوع كبير ولسة في تفاصيل كتير. أحب أسمع تعليقاتكم ومشاركاتكم. أشوفكم في الحلم ...