الأهمية

الأهمية

ايه أهم حاجة في حياتك؟
ايه هي أولوياتك الـ بتفكر فيها كل يوم وبتعمل حسابها قبل أي حاجة؟

من جلسات التدريب الشخصي لاحظت ان تقريبا السبب المشترك لكل حاجة الناس بتعاني منها هي الأهمية؛ ان ناس كتيرمش محددة أولوياتها والأشياء المهمة بالنسبة لها، أو مديين أهمية عالية لحاجات هم مش محتاجينها وبتأثر عليهم سلبا ومطنشين الحاجات الـ هم حقيقي محتاجينها. وبالتالي بيفضل الشخص يلف حوالين نفسه في حلقة مفرغة لأنه بيحاول يحل مشكلته من ناحية وفي نفس الوقت هو مدي أهمية عالية جدا ومتمسك بأسباب المشكلة.

عشان كده مهم تسأل نفسك ايه فعلا الأفكار والمشاعر والقيم المهمة بالنسبة لك؟
ولو حاجتين مهمين تعارضوا مع بعض بشكل مستمر هتدي أهمية لأي واحدة فيهم؟

لو الفلوس عندك أهم من الراحة هتفضل طول الوقت تشتغل عشان تجمع فلوس ووقت الراحة والاستمتاع بيها هيكون ضئيل جدا.
لو ارضاء الآخرين ومساعدتهم أهم من انك تكون راضي عن نفسك وتساعدها، هتفضل تجري عشان تساعد الناس وتغيرهم وهتيجي على نفسك، والمساعدة هنا ممكن تضرهم أو على الأقل مش هتفيدهم وانت هتفضل حاسس بارهاق مستمر لأنك بتحاول تساعد حد مطلبش منك مساعدة أو مش مستعد يستقبلها أو معندكش الأدوات الـ تخليك تساعده بطريقة تفيده.
لو الاستمتاع بطعم الأكل أهم من الصحة، هتفضل تاكل أي حاجة قدامك طعمها حلو وبالتالي هتؤذي جسمك (مع ان الأكل الصحي والاستمتاع بالطعم مفيش تعارض بينهم).
لو صورتك قدام المجتمع والآخرين أهم من صورتك قدام نفسك، وأهم من راحتك وسلامك الداخلي، هتفضل طول الوقت تحاول ترضي الناس والمجتمع وتعيش بقيم وأفكار مش بتاعتك عشان ترضيهم، وإن رضيوا هتفضل تعبان لأنك في العمق مش راضي عن نفسك.
لو اثبات انك "صح" أهم عندك من السلام الداخلي، هتمشي في الشارع أو في الشغل تتخانق مع أي حد عشان دايما تثبت انك صح، ولو منجحتش في اثبات ده هتفضل تاكل في نفسك، ولو نجحت هتحس براحة وهمية لحد أول موقف يستفزك وتحاول تثبت انك صح.

عشان كده من التجارب والملاحظة قررت ان في قيم مهمة جدا بالنسبة لي وأول ما أقع في مشكلة أو خوف من حاجة معينة بفكر نفسي على طول بالقيم دي:

الحضور في اللحظة: قد يكون أهم حاجة بالنسبة لي، لأني لما بكون حاضر بعقلي ومشاعري وحواسي بقدر أكون واعي وأتصرف على قد الموقف من غير قصص ومخاوف كتير في الماضي والمستقبل.

السلام الداخلي: في مواقف عارضة الواحد بيحتاج يتعامل معاها بشكل لحظي حتى لو هتأثر عليا داخليا، لكن أي شيء -أو شخص- موجود في حياتي بشكل مستمر وبيؤثر على سلامي الداخلي مش عايزه، يا إما هتجاهله وهتجنبه يا اما هتعلم أتعامل معاه مع الحفاظ على سلامي الداخلي.

التوازن: التوازن قانون الطبيعة، وبصراحة حاولت أهرب منه كتير قبل كده بس مفيش مفر، أي شيء بيزيد عن حده -جسديا ونفسيا وفكريا- بينقلب ضده. ومهما حاولت أسعى ورا حاجات تبدو براقة لكنها بتخل بالتوازن هرجع أزعل. فالتوازن بالنسبة لي مرجع ومقياس أساسي في كل مشاعري وأفكاري وأفعالي.

الحب والتقبل: من زمان قررت اني مش هشيل أي مشاعر سلبية ناحية شخص أيا كان هو مين وعمل ايه، لأن المشاعر دي بتؤذيني أنا مش هو. ولو حصل لسبب أو لآخر بحاول أرجع بسرعة للتسامح والتقبل، وده مش معناه اني هسيب حقي أو هصاحب كل الناس ويكونوا قريبين مني، لكن مش هشيل حاجة ناحية حد بحبكم كلكم وكل واحد ليه طريقه. انت راجل زي الفل وجميل بس ليك حدودك وليا حدودي ومش شرط نلتقي في نفس الطريق.

دوري: كل ما ألاقي نفسي قلقان بزيادة ناحية أي حاجة بسأل نفسي "هل في اديا حاجة أعملها؟" لو في اديا بعمل دوري وسلامو عليكو، مش في اديا يبقا سلامو عليكو من الأول. والله يا جماعة مفيش حاجة مرهقة أكتر من انك تحاول تتحكم في أحداث الكون وحاجات مش بتاعتك وملكش ايد فيها وتؤنب نفسك كمان والآخرين ان ازاي الدنيا مش ماشية على هواك!

الولا حاجة: بحب شغلي جدا وأنا الـ اختارته وبمارس أنشطة ورياضات مختلفة اخترتها، لكن أول ما أحس ان الشغل أصبح عبء وحاجة بأديها ومستني تخلص، أو الرياضة أصبحت منافسة وضغط خالي من المتعة، بفكر نفسي بقيمة "الولا حاجة". اني أكون مبسوط وراضي ومستمتع من غير ما أستنى حاجة معينة تحصل أو تكون سبب في سعادتي لأن السعادة هتزول بزوال أسبابها. وبعيد ترتيب وقتي وأولوياتي. ممكن حاجات كتير تضيف لمشاعري استمتاع وبهجة لكن لو الحاجات مشيت فالبهجة موجودة. والمذهل اني كل ما بعيش بالـ "ولا حاجة" كل حاجة تانية بتيجي وتتسير بسهولة ..

رتبوا أولوياتكم واعرفوا ايه المهم بالنسبة لكم هترتاحوا 
وفي قيم تانية كتير مهمة بالنسبة لكن دي أكتر حاجات جت في بالي
أحب أسمع مشاركاتكم وآرائكم وايه أهم قيم عايشين بيها 
يومكم جميل