الانتقام اللاواعي

احذر "الإنتقام اللا واعي"

مديرك على طول بيضطهدك ويغلس عليك وانت مش عارف تعمل حاجة وحاسس بالغضب جواك .. ومن غير ما تاخد بالك مشاعر الغضب والإضطهاد تطلعها على الموظفين بتوعك.

دخلت علاقة مع شخص جرحك أو خانك أو علم عليك .. تروح تدخل علاقة تانية وفي أقرب فرصة تلاقي نفسك بشكل تلقائي بتنفذ نفس السيناريو الـ حصل معاك في العلاقة السابقة بس على شخص تاني  لأنك لسة متجاوزتش المشاعر القديمة ومحتفظ بيها جواك. أو تفضل تشيل وتكبت مشاعرك السلبية ناحية شخص معين وبعدين فجأة تطلع عليه المشاعر دي كلها في موقف مفاجئ وغير متوقع فميبقاش فاهم حاجة!

حد كسر عليك بالعربية وزعق لك تروح في أقرب فرصة تلاقي نفسك بتكسر على حد تاني وتزعق معاه على أساس انك كده هتشفي غضبك .. وهلم جرا.

السبب الرئيسي في كل الأمثلة الـ فاتت هو عدم مسامحة الآخرين وعدم مسامحة نفسك. الإنتقام والرغبة في الإنتقام هي حاجة مؤذية جدا لكل الأطراف. ومتفتكرش انك لما طلعت مشاعرك وفرغتها بشكل مؤقت انك كده ارتحت وبقيت كويس .. لأن جذر المشكلة لسة موجود جواك ولما يتكرر معاك أي موقف مشابه هتفضل تعبي في مشاعر وبعدين تفرغ.

-اتعلم تسامح باستمرار وعدي الحاجات الصغيرة عشان توفر طاقتك
-اتعلم تشوف الدروس من ورا المواقف والعلاقات عشان تتعلم من أخطاءك ومتكررهاش
-اتعلم تركز على نفسك وأهدافك وطريقك عشان مش أي حد يجيبك يمين وشمال ويأثر في -مشاعرك وردود أفعالك بكل سهولة
-اتعلم تكون واعي بمشاعرك ويكون رد فعلك مناسب على قد الموقف من غير ما تسيب حقك في حاجة كبيرة ومن غير ما تعتدي
-اتعلم يكون في وضوح وصدق بينك وبين نفسك وتكون علاقاتك القريبة بالذات قائمة على الشفافية والصدق والتعبير والتواصل ...

-الصورة أثناء ممارسة تمرين "تدافع الأيدي" وهو أحد تمارين "التاي تشي" وهو رياضة قتالية نتعلم فيها التغلب على الخصم بنعومة وسلاسة بدون عنف أو رغبة في الإنتقام