التركيز على الآخرين

لما يكون تركيزك اليومي منصب على نقد الآخرين والسخرية منهم وازاي دي تتجوز ده وازاي دي بقى شكلها وازاي دي عملت عمليات تجميل وإلخ، ولو كنت بتتفاعل مع النوع ده من البوستات وبتعلق عليه وبتعمله شير، خد بالك من كذا حاجة:

-جزء كبير من طاقتك مهدر ومشتت في التركيز على الآخرين وتفاصيل حياتهم والدخول جوا عقولهم والحكم عليهم بناء على افتراضاتك الشخصية الأي كلام أو افتراضات شخص آخر، وبالتالي مش هتركز في تطوير نفسك وإصلاح عيوبك لأنك بتهرب وشاغل نفسك بالآخرين.

-كل كلمة بتقولها على الأشخاص دول -حتى لو هزار- هي طاقة مؤذية، الطاقة دي هترجعلك وهتؤذيك بشكل أو بآخر نفسيا، لأن ده قانون كوني اسمه قانون "الكارما" أو "كما تدين تدان". أي نوع من الطاقة المؤذية الصادرة منك هيرجع لك بنفس الدرجة حتى لو في شكل مختلف.

-كونك بتحس انك مبسوط بشكل مؤقت أو روش انك ماشي مع التريند، فده لا يعطيك الحق في السخرية والنقد والتدخل، والأذية هترجعلك هي هي، إنما الروشنة واحساس انك ماشي مع التريند هو غطاء خارجي لسلوك سيء وغير واعي.

-كون الشخص الـ بتنقده وبتتريق عليه مشهور أو ممثل أو شخصية عامة، فده لا يعطيك الحق وليس مبرر انك تتكلم عليه وتتريق، لأنه إنسان زيه زيك بالظبت.

استغل الشهر ده في انك تتواصل مع نفسك أكتر وتطورها في أي اتجاه انت حابه، خاصة في الوقت والظروف الـ احنا بنمر بيها ومعظم الناس عندها وقت كتير تستغله لصالحها. لو عايز تعيش مبسوط وعندك سلام داخلي أول قاعدة تنفذها انك تركز على نفسك وتتجنب الهري بجميع أشكاله