الحساسية الطاقية 1

الحساسية الطاقية

ناس كتير بتحكي مؤخرا انها بتتأثر بسهولة جدا بأي حاجة وكل حاجة حواليها، بيحسوا بطاقة الناس والأشياء وممكن القمر المكتمل أو حركة الكواكب والنجوم والأبراج أو وجودهم في مكان معين مع شخص معين يؤثر في مزاجهم واحساسهم 180 درجة بالسلب أو الإيجاب. في ناس ده بيحصل معاها بالفطرة من غير ما يكونوا عارفين أي حاجة عن الطاقة وعلومها، وفي ناس مهتمة بدراسة العلوم دي والتركيز معاها فأصبح ده يحصل معاها. وفي المقال ده هحاول أجاوب على سؤالين:

-هل ده حقيقي ولا وهم من عقولهم عشان مركزين مع الموضوع "بلاسيبو"؟
-هل الحساسية الطاقية علامة على ارتفاع الوعي وهل هي حاجة كويسة وصحية؟

الطاقة وعلومها حقيقية وموجودة وكل شيء حوالينا ما هو إلا شكل من أشكال الطاقة. الشجر والبحر والعمارات والحيوانات والسما والأرض كلها عبارة عن طاقة، وكمان جسمنا وأفكارنا ومشاعرنا هي مجرد أشكال مختلفة من الطاقة. على المستوى المادي قد يبدو إن الأشياء منفصلة وكل شيء له كيان قائم بذاته، لكن على مستوى الطاقة كل شيء متصل ومترابط ومتداخل، كل شيء بيؤثر ويتأثر بكل شيء حواليه على حسب عوامل كتير اسمها "قوانين الطاقة". والكلام الـ انت بتقرأه دلوقتي هو عبارة عن طاقة بتنتقل ليك وتؤثر فيك وتعيد تدويرها وممكن تؤثر في أفكارك وأفعالك الـ هي بردو طاقة. الكلام ده أدركته الحضارات القديمة من زمان وبنيت علومهم ومعابدهم على أساسه، وأدركه العلم مؤخرا في ملايين الأبحاث والكتب حول العالم وانتشر بأشكال مختلفة تحت مسمى علوم الطاقة.

المشكلة الـ حصلت ان كتير من العلوم دي بتدرس وتنقل بطرق سطحية ومحدودة، أحيانا بيكون المدرب نفسه علمه محدود وأحيانا بيستغل الموضوع بشكل تجاري بحت من غير قيمة حقيقية، وده بيضر المتلقي بشكل كبير جدا لدرجة اني شفت حالات كتير حياتها تدهورت للأسوأ بعد دراسة علوم الطاقة، ده غير العك اللانهائي الموجود ع النت والـ بعض الناس بتتعامل معاه كأنه علم منزل من السماء. وبدل ما الإنسان يستغل العلوم دي في صالحه ويصبح أكثر اتزانا وتطورا على كل الجوانب، كتير من الناس أصبحت تردد عبارات مثل:

"مش هعرف أقعد في الكرسي ده لازم أنظف طاقته الأول
مش هعرف أدخل المكان ده استنى أنظف طاقته الأول
أنا ماشية من هنا عشان بحس بالطاقة وفي ناس طاقتهم سلبية
أنا النهار ده في حالة غضب عشان القمر المكتمل
في حدث كوني بيحصل ونيازك بتتحرك ف أنا مش في المود اليومين دول
أنا تعبان شوية عشان في حد بيبعتلي طاقة سلبية
أنا شفت رؤية النهار ده وعارفة ان في أحداث سلبية كتير ودماء وحروب جاية"

والملفت في الأمر ان ناس كتير بتردد العبارات دي بفخر وحماس وشيء من الغموض أحيانا ..
تفتكر حد بيردد العبارات دي باستمرار حياته عاملة ازاي؟
تفتكرالمعرفة بالطاقة والروحانيات أفادت الشخص ده ولا أذته؟ قوته ولا أضعفته؟؟

يتبع في الجزء الثاني ...