الحساسية الطاقية 2

الحساسية الطاقة 2

المعرفة في الطاقة والما-ورائيات ليها احساس جذاب ومبهر، كونك عندك قدرات خارقة غير باقي البشر، كونك بتحس بطاقات وبتشوف هالات الناس العادية متعرفش عنها حاجة، كونك بتحس بتأثير القمر المكتمل وعندك اتصال بأكوان وكائنات وعوالم غريبة، كونك دايما بتتكلم بلغة الشاكرات والهالات والأبراج والبوابات النجمية وبتدي للأمور العادية تفسيرات عميقة، كل دي حاجات جذابة جدا بتدي للشخص احساس بالتميز والعمق وبتبهر الناس الـ حواليه. ومن هنا أصبح الدافع الأساسي لدراسة الطاقة والمعرفة عنها والكلام فيها عند كتير من الناس، هو ليس دافع للفهم والتطبيق والتطور، انما دافع مبني على الرغبة في التميز والمنظرة وأحيانا هروب من الواقع أو عمل كورسات لجني الأموال على حساب جهل الناس تحت مسمى "الروحانيات".

والنتيجة الطبيعية لكل ده هو ناس عندها معلومات كتير وشهادات أكتر بس حياتها متلخبطة وغير متزنة ولسة مش عارفين يتعاملوا مع أبسط مشاكل حياتهم. وع الجانب الآخر ناس تايهة بتحاول تطور نفسها مش عارفة تبدأ منين وتروح فين وتيجي منين وممكن يقعوا ضحية لنفس وهم الروحانيات.

أبسط قواعد الحياة انك عشان تبني عمارة إن يكون الأساس بتاعها سليم وقوي قبل ما تطلع لفوق، عشان تقود سيارة في شارع زحمة لازم تتعلم القيادة في شارع فاضي الأول، عشان تدرس لغة معينة لازم تبدأ بتعلم بعض الحروف والكلمات الأساسية، عشان تلعب مقطوعة لـ بيتهوفن ع البيانو لازم تبدأ تتعلم النوتة الموسيقية وتبدأ تدرب عليها واحدة واحدة وتلعب مقطوعات بسيطة في الأول ... وهكذا. كل ده أمثلة واضحة وبديهية، اشمعنى لما نيجي نتكلم ع التطوير الذاتي والطاقة بنعمل العكس؟!

ازاي عايز تطور من طاقتك الغير المرئية وانت جسدك ضعيف وبتتعب من أقل مجهود وبتاكل أكل غير صحي؟
ازاي تتكلم على نشر الحب في كوكب الأرض وانت كل يوم بتتخانق مع الناس في الشارع أو في الشغل؟ أو عندك غضب وحقد وغيرة مستمرة ناحية أشخاص؟
ازاي هتنشر السلام في الكون وانت مش عارف تقعد مع نفسك 10 دقائق في سلام وهدوء؟

اهتم بالقاعدة وابنيها صح بعد كده نتكلم في الروحانيات والماورائيات، وساعتها مش هيكون عندك رغبة أصلا في الانبهار والابهار، لأنك لو اهتميت بجسمك وتوازنه، واهتميت بنظام يومك، واهتميت بالحواس الخمسة قبل ما تتكلم في السادسة والسابعة، هتكون النتيجة الطبيعية هي السعادة والسلام والتوازن، وهتبدأ تطور واحدة واحدة بالتدريج الطبيعي في تناغم مع الطبيعة. الشجرة العملاقة عندها جذور ممتدة في الأرض أطول من طولها الـ انت شايفه، والجبل الشاهق كذلك انت مش شايف بعينك غير جزء بسيط من حقيقة تكوينه. وكل ما تهتم بالأساسيات (في أي علم وأي مجال انت عايز تتقنه) كل ما هتعلا وهتطور بشكل أفضل وسرعة أكبر. كل ما هتستعجل النتائج كل ما هتعطل نفسك وهتشغل بالك بأوهام انت مش محتاجها.

الموضوع كبير والكلام فيه كتير .. أحب أسمع آراءكم وتعليقاتكم، وبفكركم ان أنا مش ضد دراسة أي علم، اعرف وادرس الـ انت عايزه بس افتكر الكلام الـ فوق عشان تستريح وتستمتع وتستفيد. ولو عايز تعرف عن الموضوع بعمق أكتر ادخل على اللينك الموجودة في التعليقات هتلاقي سلسلة تسجيلات صوتية مجانية في قناتي على التليجرام اسمها "أوهام الوعي" فيها شرح مفصل لكتير من الأوهام المنتشرة الـ ارتبطت بالوعي وازاي تفرق بين الحقيقة والوهم ...