الشك في العلاقات

صباح النور 

الشك في العلاقات من الحاجات الـ بتضعف التواصل، أو وجوده بيكون علامة على عدم وجود تواصل حقيقي. مش بتكلم على الشك بمعنى الخيانة والتفتيش في الموبايل وكده، لكن بتكلم عن الشك في التواصل؛ بمعنى ان يكون في طرفين بيتواصلوا لكن كل واحد بيفكر: "أقول كده ولا مقولش؟ أعمل كده ولا هيتضايق؟ مش هقول كذا عشان هتفهمني غلط - مش هعمل كده عشان ابين حاجة تانية - هبين حاجة معينة وأشوف رد فعله .. وهكذا".

كل دي أمثلة بتبين إن التواصل مش حقيقي أوي وفي حسابات كتير. وده مع الوقت بيضعف الصلة وبيسبب مشاكل كتير لأن العلاقة -أيا كان نوعها- بتتحول لعملية حسابية وخطط، وده أبعد ما يكون عن الحب الحقيقي والتواصل البسيط التلقائي الـ مفهوش حسابات وترتيبات كتير لأنه مبني على الشفافية والوضوح والتقبل. التواصل الحقيقي بيكون في احساس بالحرية والخفة، إن كل شخص مش بيمثل ومش بيخبي وبيكون على طبيعته، مفيش حاجة يخبيها لأن مفيش حاجة يخاف منها. ومش معنى كده إني معملش اعتبار للطرف التاني ومخاوفه ومعتقداته وأقول أي كلام في أي وقت، لكن مينفعش "الاعتبار" ده يكون زيادة عن اللزوم فيتحول لحساسية مفرطة تخلي التواصل عملية حسابية معقدة فيها مجهود كبير.

باختصار التواصل الحقيقي بيكون جميل ومليان حضور وأثنائه بيتلاشى الإحساس بالزمن، والصمت فيه مفرقش كتير عن الكلام، لأن الكلام بيكون نابع من سكون وحضور مش هروبا من الصمت أو بنتكلم عشان نغطي عليه. وده مش بيحصل من غير لما الطرفين يكونوا حقيقيين مع بعض، وكل واحد يكون حقيقي مع نفسه ...