الوفرة والندرة

كنا بنتكلم في آخر جلسة عن الوفرة

للوفرة معاني عظيمة وحل لمشاكل كتير

الوفرة عكس الندرة؛ الندرة انك تكون شايف ان مشكلة معينة ملهاش غير حل واحد

الشخص الـ بيفكر بطريقة الندرة هو شخص دايما فقير؛ فقير في المشاعر وفقير في الأفكار وفقير في الفرص وفقير في المال وفقير في الإبداع

دايما حابس نفسه في مصدر واحد هييجي منه الرزق

وطريقة واحدة هتتحل بيها المشكلة "ده لو في"

وعلاج واحد للمرض يا اما ملهوش علاج

وتفسير واحد واجابة واحدة جاهزة لكل الأسئلة

أو اختيارين مالهمش تالت

الندرة طريقة تفكير متعبة جدا وللأسف ناس كتير عايشين بيها ... عايشين في معاناة مستمرة لأنهم كل مرة بيختاروا نفس الاختيار لأنهم مش شايفين غيره مع انتظار نتائج مختلفة!

الوفرة انك تخرج شوية برا حدود عقلك ومعتقداتك وتجربتك وتسمح لنفسك تشوف احتمالات مختلفة، اما بسؤال الآخرين أو البحث أو خوض تجارب مختلفة بنفسك

تأكد ان كل لحظة بتشوفها هي احتمال واحد من ملايين الاحتمالات اللانهائية ... وكل لحظة انت بتختار بالفعل -بوعي أو بدون وعي- واحد فقط من الاحتمالات دي ... وفي غيره اختيارات لا نهائية ... وكل اختيار من دول هيترتب عليه سلسلة من التجليات والفرص والعلاقات والأحداث إلى ما لا نهاية

لاحظ وجاوب:

تفتكر ايه أكتر معتقدات موجودة عندك -أو في بيئتك بشكل عام- وجمل بنرددها ممكن تكون بتبعد عننا الوفرة؟