ذاكرة خارقة؟

ذاكرة خارقة؟
Marilu Henner - Superior autobiographical memory

موضوع شيق جدا ظهر قدامي وهيكون محل دراسة وتدريب الفترة القادمة، وهو "الذاكرة الفائقة للسيرة الذاتية".

الممثلة الأمريكية ماريلو هينرعندها القدرة على تذكر تقريبا كل حاجة حصلت في حياتها! مجرد ما تقولها تاريخ معين تقولك ده كان يوم كذا في الأسبوع وكنت لابسة كذا ورحت كذا وعملت كذا بالتفصيل الممل، وحتى لو يوم عادي محصلش فيه حاجة مميزة وعدى عليه عشرات السنين بتكون فاكرة تفاصيله!

ماريلو وهي صغيره كانت بتحضر ورش عمل للتمثيل، وكانوا بيعملوا تمارين معينة لتذكر روائح وألوان ومشاهد معينة، وهي كانت دايما تفتكر كل حاجة بالتفصيل ... وزملائها يتسائلوا: "هي ازاي على طول فاكرة كل حاجة كده؟" وهي تتسائل: "هم ازاي الناس بياخدوا وقت عشان يفتكروا كل حاجة كده؟"

ماريلو بتوصف ذاكرتها كأنها بتفتح جهاز dvd مجرد ما تذكر حدث معين أو سنة معينة، وبتشوف صور كل الفايلات قدامها وتقلب بينهم وتختار الحدث الـ عايزة تفتكر تفاصيله.

الناس دايما بتفضل تستغرب وتسألها انتي بتعملي ايه عشان ده يحصل؟ وهي بالنسبة لها "أنا ما بعملش حاجة هو بيحصل!". أصدقائها القدامى لما يتجمعوا معاها يقولولها "احكيلنا أسبوع من أيام الطفولة"، وتروح فاتحة الملف في دماغها وتحكيلهم ذكريات أسبوع معين بالتفصيل ومين عمل ايه وقال ايه والساعة كذا عملنا ايه وكل واحد كان لابس ايه وبياكل ايه.

سيدة عملت مقابلة مع ماريلو وكانت حريصة ان لبسها يكون أنيق وكل حاجة تكون تمام قبل الانترفيو عشان لو في أي غلطة الست هتفضل فاكراها للأبد ... وبعد المقابلة بـ 6 شهور اتقابلوا تاني وماريلو كانت فاكرة بالتفصيل اليوم والست كانت لابسة ايه وانها مكملتش أكل الطبق بتاعها 

ماريلو دايما الناس بتسألها عن الذكريات السيئة وهل بتؤثر عليها انها فاكرة كل حاجة مؤلمة حصلت لها بالتفصيل أو علاقات انتهت، واجابتها ببساطة بتكون انها تقدر تختار المواقف الـ تركز عليها وتتعلم منها.

ماريلو مش هي الوحيدة في العالم وفي حالات نادرة من أشخاص عندهم ذاكرة فائقة للسيرة الذاتية، ولما اتعمل أبحاث وفحوصات واختبارات عليهم، اتضح ان عندهم مناطق معينة في المخ أكبر عشر أضعاف من الحجم العادي عند بقية الناس!

ماريلو ألفت كتاب "حياة لا تنسى" وبتتكلم فيه عن تجربتها وطريقة رؤيتها للعالم، وبتوضح فيه ان أينعم هي مولودة بالموهبة دي، لكنها طول حياتها كانت بتدرب عليها عشان تقويها، وبتشرح في الكتاب تمارين تساعد الناس تقوي ذاكرتها بدرجة كبيرة حتى لو موصلوش لنفس مستواها، مثلا عن طريق انك آخر اليوم قبل ما تنام تراجع الصور والمواقف المفيدة الـ مريت بيها أثناء اليوم والـ انت حابب تفتكرها، وتكرر ده مرتين أو أكتر كل يوم قبل ما تنام، وانك تكون دايما حاضر في اللحظة الحاضرة وواعي بكل حاجة بتحصل حواليك.

اسم الكتاب:
Unforgettable Life by Marilu Henner

*في أول تعليق فيديو عن الذاكرة الفائقة للسيرة الذاتية، واليوتيوب مليان فيديوهات عن الموضوع.

لو عندك ذاكرة زي ماريلو ... يا ترى هتستخدمها في ايه؟