عشق الرالي

من زمان وأنا بعشق السيارات وتفاصيلها وسباقاتها، لكن الرالي ده بالذات ليه عشق خاص في قلبي. الرالي مختلف عن السباقات العادية في حاجات كتير، في السباق العادي كل العربيات بتكون موجودة ع الطريق في نفس الوقت والـ يسبق هو الـ بيكسب، إنما في الرالي الموضوع مختلف ... كل عربية بتكون لوحدها ع الطريق، والطريق أصلا بيكون ضيق جدا وفي الغالب يا دوب مساحته تاخد عربية واحدة، وبيكون السباق مع الزمن. يعني كل سائق بيكون ع الطريق لوحده وبيتحسب الزمن بتاعه والـ يخلص الرالي في أسرع زمن هو الـ بيفوز. وده بيحط تحديات مختلفة وممتعة وصعبة جدا أمام السائق، لأنه حرفيا بيسابق نفسه وبيسابق الزمن ولازم يبذل أقصى حاجة عنده طول الطريق عشان يخلص في أسرع وقت على أمل ان تطلع النتيجة النهائية أسرع من منافسيه.

في السباقات العادية في الغالب بيكون الطريق أسفلت ناعم مصمم للسباق، أما في الرالي العربيات هي الـ بتكون مصممة عشان تتأقلم مع الطريق! طبيعة الطريق بتختلف على حسب طبيعة الدولة، الطرق محفورة في وسط الجبال والصحاري والغابات والثلوج وأحيانا حصى وزلط وطرق أسفلتية وعرة ضيقة وسط البيوت. وعلى مدار السنة البطولة بتلف قارات كتير بيتعرض خلالهة المنافسين وسياراتهم لجميع أنواع الطرق والظروف المناخية.

تجهيز السائق والمساعد:

المنافسة الحقيقية في بطولة العالم للرالي بتبدأ من قبل ميعاد السباق المعلن بكتير، طبعا السائق ومساعد السائق عشان يتم اختيارهم بيكونوا اتعلموا في مدارس مخصوصة ودرسوا لسنين واتدربوا وعدوا اختبارات كتيرة وصعبة، عشان شركات سيارات تختارهم وتتعاقد معاهم وتستثمر فيهم بملايين. والدراسة مش بس مهارة القيادة وارشاد الطريق الـ بيقوم بيه مساعد السائق، لكن جزئ كبير من الدراسة هو إلمام كامل بكل تفاصيل السيارة الميكانيكية نظريا وعمليا لأن وارد يحصل أي عطل في الطريق ومفيش حد غيرهم هيساعدهم في وسط الغابة أو الصحرا! فمن الآخر السائق ومساعده لازم يكونوا سائقين محترفين ومهندسين ميكانيكيين عندهم المهارة انهم يصلحوا أي عطل ممكن تصليحه في أي لحظة، ده غير المهارات النفسية الـ بيتعلموها في التركيز والحضور والهدوء وسرعة الاستجابة.

تجهيز السيارة:

وراء كل سائق عظيم فريق عظيم بيشتغل 24 ساعة قبل وأثناء وبعد الرالي لتجهيز السيارة ومتابعة أدائها وأخذ ملاحظات وتصليحها بين المراحل. كل رالي مقسم لمراحل وطبعا السيارة بعد كل مرحلة بتكون محتاجة تصليح وتجديد وتموين وتغيير العجل في وقت محدود قبل المرحلة التالية، وكل ما تكون السيارة حالتها سليمة بتكون فرصة الفريق أكبر في تصليح السيارة وتجهيزها مرة أخرى بشكل كامل. سيارات الرالي بتكون في الأصل ماركات عادية معروفة وبنشوفها في الشارع زي

ford fiesta - toyota corolla - subaru impreza - peugeot 308 - citroen xsara ...

لكن في الحقيقة هو الهيكل والإسم فقط الـ شبه العربية الـ بنشوفها في الشارع

السيارة يتم تصنيعها من الألف للياء بمواصفات خاصة ومختلفة جدا عن السيارات المعروفة. الموتور يكون أقوى بأضعاف والسيارة من الداخل تحتوي فقط على كرسيين بتصميم مخصوص لتخفيف الوزن وكل قطعة من الجنوط للإطارات للفرامل يتم تصنيعها وتركيبها خصيصا للسيارة لتتناسب مع أداء الرالي والطرق الوعرة. قبل كل رالي يجتمع الفريق ويضعون خطة مسبقة لتجهيز السيارة وكيفية التصرف في الاحتمالات المختلفة، الخطة تشمل تفاصيل كثيرة مثل نوع الإطارات وشد أو ارخاء المساعدين والفرامل وتقصير أو تطويل مدة النقل في علبة التروس كل ذلك حسب نوع الطريق والأحوال المناخية والغرض من الأداء (القيادة بأمان للحفاظ على نفس المركز أو المخاطرة في بذل أقصى جهد للتقدم). وبعد انتهاء المرحلة يبدأ فورا فريق العمل باستقبال السيارة والكشف عليها واختيار ما يقومون بتصليحه حسب الأولوية، وأحيانا بيضطروا يتركوا الهيكل أو بعض الأجزاء دون تصليح لضيق الوقت! العمل في الفريق يحتاج لتناغم وسرعة وتركيز وتدريب غير عادي لأن فعلا الثانية بتفرق، وأي خطأ في تجهيز السيارة ممكن يؤدي لحادث أو هزيمة.

مش مانيوال ولا أتوماتيك:

ناقل الحركة في سيارات الرالي مش مانيوال ولا أتوماتيك، المانيوال هياخد وقت طويل جدا عشان السائق يضغط ع الدبرياش وينقل في وسط السرعة الرهيبة والمنعطفات السريعة، وفي الأتوماتيك بيكون التحكم محدود جدا بالسيارة، فصندوق التروس في سيارات الرالي بيكون مختلف، الناقل بيكون مانيوال لكن مفيش دبرياش، السائق بتكون رجله اليمين ع البنزين والشمال ع الفرامل لسرعة الاستجابة، والناقل اليدوي بيتحرك في اتجاه واحد بضغطة بسيطة تزود أو تقلل نقلة، وده بيدي أفضل تحكم في السيارة مع الحفاظ على سرعة النقل.

In Action!

جه وقت الإثارة وأعلنت إشارة البداية! السائق يكون في حالة تركيز وحضور تفوق أي وصف، ويختبر مشاعر مختلفة .. مزيج من الإثارة والحماس والنشوة والخوف وشد الأعصاب والهدوء الداخلي ... السائق أحيانا بيتجاوز سرعة الـ 200 كم \ ساعة في طرق ضيقة جدا بين أشجار أو على حافة جبل! ومطلوب منه يركز في القيادة والمنعطفات والسرعة وأداء السيارة والوصول لخط النهاية في أسرع وقت وأقل خسائر ممكنة ... أحيانا ممكن يكسب أو يخسر بطولة على جزء من الثانية! كل فرملة ومنعطف وقرار وحركة بتفرق، وقد تكون أهم وظيفة يقوم بيها السائق هي الاستماع لمساعد السائق!

مساعد السائق في بطولة العالم للرالي ليه دور عظيم لا يقل أهمية وصعوبة عن السائق، وأنا شخصيا بحب شغلانته جدا وتخيلت كتير زمان اني مساعد سائق رالي! مساعد السائق هو باختصار gps فائق السرعة، يجلس بجوار السائق ويمسك كراسة مكتوب فيها كل منعطف على الطريق ودرجة حدته وتعليمات دقيقة وسريعة للسائق يتصرف ازاي، مساعد السائق مطلوب منه يقرأ كل كلمة في وقتها المناسب وإلا هيودي السائق في داهية لو قال له يمين وهي شمال ... أو لو قال له منعطف خفيف وهو منعطف حاد! مساعد السائق مطلوب يقرأ الإرشادات ويقولها في وقتها المناسب مع متابعة الطريق مع متابعة حالة السيارة وتحذير السائق في حالة أي خطر والتواصل مع بقية الفريق إذا لزم الأمر. من كتر ما بيتكلم بسرعة أول مرة شفته في رالي زمان ع التلفزيون افتكرتهم مشغلين أغنية راب

قلت ايه ده هم روشين أوي كده ماشيين بسرعة ومشغلين أغاني راب في الرالي!

طبعا الرالي في وسط كل الظروف والأجواء دي لا يخلو من الحوادث المميتة، لكن نسبة الوفيات قلت كتير عن زمان لأن السيارات أصبحت متطورة وأكثر أمانا، فممكن تلاقي العربية بتتشقلب 20 مرة وتتكسر وتفرقع وتلاقي السائق والمساعد خارجين من العربية عادي جدا! ده غير انهم بيكونوا لابسين لبس واقي والحزام مصمم انه يحافظ على ثباتهم في المقعد مهما حصل للسيارة. وفي حالة حصل حادث عنيف زي ده (أحيانا العربية تتشقلب من قمة جبل أو تقع في الميه أو تدخل في غابة أشجار) بيطلعوا من العربية ويشوفوا حالتها .. لو لقوها فيها أي حاجة سليمة وممكن تمشي بيحاولوا السائق والمساعد يصلحوها ويكملوا بيها لآخر المرحلة .. ولو مفيش أمل بيخرجوا من المرحلة وونش بياخد العربية وهليكوبتر بتاخدهم، بعد كده الفريق الميكانيكي يقرر إذا كانت السيارة ممكن تصليحها، وفي حالة فقدوا الأمل بيتم شراء سيارة جديدة عادي جدا

Sponsors:

طبعا السيارة بتكون عبارة عن لوحة إعلانات ماشية، ودايما هتلاقيها من كل جانب عليها إعلانات من شركات كتير الـ بتصرف على السيارة وبتستفيد من الإعلانات، وأحيانا بيكون اسم الفريق على اسم شركة هي الراعي الرسمي زي Red Bull.

بعض الشركات بتكون بتصرف على السيارة بشكل مباشر زي شركات الإطارات والفرامل والمساعدين، وبعضها ملهاش علاقة بمجال السيارات. أنا شخصيا عرفت ان في شركة اسمها nikkon بتاعة كاميرات من وأنا عندي 12 سنة تقريبا لأن إعلانها كان موجود على مراية عربية بيجو، ووقتها مكانش عندي أي معرفة أو اهتمام بالتصوير والكامريات

حياة الرالي متعبة جدا جسديا ونفسيا وأكيد فيها جانب كبير من المتعة والإثارة .. الفريق بيفضلو طول السنة في حالة سفر مستمر من دولة لدولة ومن قارة لقارة وتخييم في الصحرا وفي الثلوج وفي المطر. وأكيد مش حاجة سهلة الارتباط بشخص بيشتغل في مجال زي ده

وبالنسبة لي متابعة بطولة العالم للرالي والمعرفة عنها هي حاجة جميلة جدا بيمتزج فيها الإنسان مع قوى الطبيعة وبيتحط تحت ضغط من كل النواحي وده بيجبره انه يكتشف أبعاد في نفسه ملهاش نهاية ... مئات الآلاف من الناس حوالين العالم بيشاركوا كل سنة عشان يطلعوا عمل فني بيلخص كل حاجة في التجربة الإنسانية ... بطولة العالم للرالي.

اتفرجوا ع الصور واقرأوا الـ caption

وهحط لكم بعض الفيديوهات في التعليقات

أتمنى تكونوا استمتعم بالرالي واستفدتم