عندما تبدأ مشروعا

لما تيجي تعمل مشروع أو تجهز لسفرية أو تحوش عشان تشتري حاجة، مهم تدرك انت بتبدأ منين وبتحط نفسك في أنهي خانة؟
يعني بتبدأ وانت بتقول لنفسك ان دي حاجة صعبة أوي وهعاني كتير واحتمال نادر انها تنجح ولو نجحت مش هتستمر، ولا بتبدأ وانت برنس ومرتاح ومؤمن ان الحياة فيها رزق ووفرة وخير كتير وهتجيلك الفرص المناسبة في الوقت المناسب؟ وفي نفس الوقت تكون بتعمل الـ عليك؟

الطريقتين مختلفين جدا وكل طريقة هيكون ليها أثر كبير في رحلتك ومجهودك واستمتاعك.

"ما تبحث عنه يبحث عنك" فريدريك داودسون مرة قال حاجة رائعة انك لو عايز فلوس لازم تكون جذاب للفلوس عشان تجيلك، زي لو عايز ترتبط بشخص معين لازم تكون جذاب للشخص الـ قدامك وإلا هيجيلك ليه؟؟ تخيل معايا للحظة ان انت شخصيا "فلوس"، هتحب تروح لشخص برنس واثق في نفسه وبيحبك بس مؤمن انك هتجيله في الوقت المناسب؟ ولا شخص عايز يمتلكك لكن قاعد يكرر كل يوم ان الفلوس مبتجيش بالساهل وان لازم الواحد يكون حرامي عشان يعمل فلوس؟

طبق الكلام ده على كل حاجة في حياتك، قبل ما تسعى لتحقيق شيء مادي أو معنوي اتأكد الأول من أفكارك ومعتقداتك عن هذا الشيء أيا كان هو ايه، وراقب مشاعرك في التعامل معاه وخليها مشاعر جميلة ~

*ملامحي في الصورة قالبة على شخص صيني معرفش ليه لكن هي صورة جميلة