عن التأمل

بعض ما تعلمت من التأمل:

بدأت أمارس التأمل كتمرين بيتعمل في وقت معين أثناء اليوم، وده في حد ذاته افادني كتير، لكن الفائدة الحقيقية اكتشفتها بعد قراءة كتاب قوة الآن "the power of now" وأدركت إن التأمل الحقيقي هو الحضور في كل لحظه؛ مش بس انك تغمض عنيك وتلاحظ التنفس في وقت معين أثناء اليوم، لكن التأمل هو ان كل حاجة بتمارسها في حياتك تكون نوع من التأمل، الأكل والرياضة والتواصل مع الناس والعمل وحتى النوم ممكن يكون تأمل.

-اتعلمت إن اللحظة الحاضرة تكون أولوية حياتي، طول ما أنا موجود بكامل طاقتي وحواسي في الحاضر، أقدر أتعامل مع أي حاجة بسهولة، لكن لو في فكرة معينة مسيطرة عليا في الماضي أو المستقبل، صعب جدا أتعامل معاها وصعب جدا أستمتع بأي حاجة أنا بعملها.

-اتعلمت ان الصحة والجانب الجسدي مهم جدا، من ملاحظتي لجسمي وعادات الأكل باستمرار لاحظت إني كنت باكل أنواع وكميات جسمي مش محتاجها، وبتؤثر سلبا على أفكاري ومشاعري. مع التدريب تدريجيا بدأت آكل الأنواع والكميات الـ جسمي محتاجها وده على مستوى النشاط والتركيز والبهجة في حياتي بشكل عام.

-اتعلمت ان السبب الرئيسي للمشاكل في العلاقات هو عدم الحضور، بنكون قاعدين مع بعض لكن في الحقيقة كل واحد قاعد مع دماغه وأفكاره ومعتدقاته وأحكامه عن الشخص التاني ... اتعلمت تكون علاقة التواصل مع أي شخص في البيت أو في العمل أو صديق أو بائع، تكون نوع من التأمل، وده في حد ذاته بيكون تواصل في متعة واكتشفت مع الوقت ان معظم مشاكل العلاقات هي حاجات موجودة في دماغنا بسبب تفكيرنا وبسبب ان كل طرف قاعد يحكم على التاني باستمرار.

-اتعلمت ادي الاسترخاء والسلام الداخلي أولوية في حياتي، وخاصة في العمل. معظمنا اتربينا ان الشغل ده تعب وقرف ولازم الواحد ييجي على نفسه وهيفضل دايما طهقان والعائد قليل، مع الوقت اكتشفت ان كل ده مجرد أوهام واشتغلت في الـ أنا بحبه الحمد لله ومرتاح في شغلي ووقتي وبستمتع بيه ومش بحط على نفسي ضغط في الشغل والعائد ماديا ومعنويا كل يوم للاعلى.

-اتعلمت أهمية التقبل في الحياة، مهم تتقبل اللحظة الحاضرة لأنها كده كده موجودة، ولأنك مش هتعرف تعيش في أي مكان غير "هنا" وأي زمان غير "دلوقتي". ممكن عقلك يروح ويسرح شوية ومشاعرك تروح وتيجي لكن جسمك مش هيعرف يكون في أي حتة غير دلوقتي، وعشان تعمل أي تغيير وتطوير في حياتك شئت أم أبيت هتبدأ بـ هنا ودلوقتي. والحقيقة ان التقبل مش معناه الاستسلام، لكن التقبل هو بداية أي تغيير، عشان تقدر تغير صفة فيك مش عايزها أو تغير واقع مش عاجبك في البداية لازم تعترف بوجودها وتتقبلها عشان تقدر تتعامل معاها. وفي قاعدة مهمة بتقول: "كل ما تتقبله تستطيع تجاوزه ... كل ما تقاومه يزداد صعوبة.

---
ورشة عمل "قوة الآن" هي تدريب عملي الحضور في كل لحظة، في العلاقات والعمل والصحة وكل نواحي الحياة.

للمهتمين بالحضور:
*الورشة في حديقة المريلاند بمصر الجديدة من 28 لـ 30 يونيو، خصم الحجز المبكر ينتهي 20 يونيو
*النسخة الأون لاين من الورشة "الحضور من أي مكان في العالم" تبدأ يوم 20 يونيو