عن المشاعر

كل حاجة في حياتنا بتبدأ وتنتهي بمشاعر، وأثناء الرحلة دايما بنمر بأنواع مختلفة من المشاعر. نقدر نقول إن المشاعر هي محرك كبير وأساسي لكل حاجة بنعملها من أكل للحفاظ على البقاء للتطور للشغل للارتباط للخناقات للحروب للسلام للاحتفال ... بحس بألم في رجلي (مشاعر) بقرر أجلس على كرسي فبحس بالراحة (مشاعر). عندي رغبة للارتباط (مشاعر) بدخل في علاقة وبنبسط مع شريك حياة (مشاعر) وهكذا ...

لكن هل سألت نفسك بتمر بمشاعر قد ايه في يومك؟ اختبرت مشاعر قد ايه في حياتك؟ هل بتاخد بالك من المشاعر الجديدة ال بتعدي عليك؟ هل بتسمح لنفسك تعيش مشاعر جديدة كل يوم؟ ولا مشاعرك هي هي متكررة باستمرار؟؟

المشاعر هي حركة الطاقة من خلال الجسم والأفكار، وبدراسة المخ وتفاعل الخلايا العصبية مع مثيرات مختلفة، وجد العلماء ان احنا عندنا القدرة اننا نختبر آلاف الأنواع من المشاعر، وأنا شايف إن في مليارات مش بس آلاف المشاعر ال ممكن نعيشها، ومش بس كده ده احنا كل يوم ممكن نعيش مشاعر جديدة محدش عاشها قبل كده أو نركب مشاعر مختلفة مع بعضها ونبتكر مشاعر جديدة، وده بيحصل بالفعل!

عشان كده تجربة الحياة لما تكون مكررة وكل يوم بتعمل نفس الحاجات بطريقة مبرمجة بتكون حياتك فقيرة في المشاعر، وبالتالي بتسيطر مشاعر واحدة رمادية فيها ملل ورتابة ومفهاش تطور. ولو حاسس ان ده موجود في حياتك، هقترح عليك كذا حاجة:

-جدد: دايما جدد في حياتك على كل المستويات؛ جدد في أفكارك واقرأ عن حاجات متعرفهاش واقعد مع ناس مش شبهك من وقت للتاني واتفرج ع العالم من منظورهم، جدد في الأماكن الـ بتروحها وسافر واخرج في أماكن جديدة، جدد في نفس المكان الـ انت عايش فيه أو بتشتغل فيه كل يوم حتى لو ببعض الديكورات والطرق البسيطة وتتخلص من الأشياء الغير مستخدمة، جدد في علاقتك مع الناس القريبين منك بانكم تخرجوا وتعملوا أنشطة مختلفة وتشاركوا بعض في تجارب، تناول وجبات انت مش متعود عليها من مطاعم جديدة وثقافات مختلفة أو اطبخ أكل بطريقة جديدة ... كل ده هيخلي حياتك مليانة ألوان مختلفة ومشاعر جديدة كل يوم هتخلي حياتك فعلا ممتعة وفيها تجدد ونعنشة دايما.

-لاحظ: عارف اللقطات الصغيرة الـ بتحس فيها بحماس أو نشوة وانك طاير من الفرحة أو بتضحك من قلبك أو بتمر بأي مشاعر مش معتادة ومكررة؟ امسك في اللحظات دي شوية ... بطأ التصوير وعيشها شوية بكل حواسك .. شمها وتذوقها والمسها واتفرج على نفسك بالتصوير البطيء كل مرة تمر بيها بمشاعر زي دي ... مش هقولك ع الـ هيحصل!

-تقبل: حتى أوقات الحزن والفقد والخوف، تقدر تتقبلها وتتفرج عليها، وتشوف رد فعل جسمك تجاهها ... وتتساءل يا ترى هي المشاعر دي عبارة عن ايه وعايزة توصلني لفين؟ وتبتدي تتأمل فيها وتتقبلها بحيادية من غير ما تكون عايز تخلص منها ... الموضوع مش سهل أبدا لما تكون مشاعر قوية مسيطرة عليك .. لكن بالتدريب تقدر تتقبلها وتفهمها وتتفرج عليها وتتعلم منها ... لأنها معلم حقيقي!

-تخلى: بطل تشيل على كتفك وقلبك وعقلك وجوا جسمك مشاعر مش بتاعتك! تخلى باستمرار عن أي مشاعر مش مفيدة ليك زي التأنيب المستمر والشعور بالتقصير واللوم وعدم المسامحة، سامح نفسك دايما عشان تقدر تسامح حد غيرك، خلي اللحظة الحاضرة هي أولويتك وتخلى عن أي مشاعر من الماضي والمستقبل لم تعد تخدمك. كل ما تتخلى أكتر، كل ما هتسيب مساحة جواك انك تعيش مشاعر جديدة، كل ما هتطور وتستمتع بحياتك بألوان جديدة ... تحمل مسؤولية مشاعرك ومتسمحش لحد يجبرك تحس بمشاعر معينة مش هتفيدك، وفي نفس الوقت لو مريت بمشاعر مش مريحة تقبل وجودها ولاحظها، لكن ارجع ركز ع المشاعر الجديدة الـ انت عايز تعيشها.

الكلام يطوووووووووووووووووووووووووووووووول عن المشاعر ولسة هنتكلم كتير ... وهشارك معاكم بعض المشاعر الـ بحبها عشتها من زمان أو قريب أو حاليا بعيشها ... في حاجات صعب تتحط في كلمات بس هحاول أوصفها ...

بوابة سحرية: مشاعر غريبة كانت بتجيلي وأنا طفل بحس كأن في بوابة سحرية اتفتحت على عالم تاني ... وكل حاجة حوليا بتكون ألوانها واضحة وجميلة .. وبحس بحرية واستمتاع عالي يفوق أي وصف أو تصور ... الأشياء حوليا هي هي لكن احساسي من عالم تاني.

الحالة: مشاعر كانت بتجيلي وأنا طفل .. بحس اني فجأة بدون مقدمات بتفرج على نفسي ... كأني شايف نفسي في فيلم سينما من برا وسامع صوتي كأني أول مرة أسمعه .. مكنتش بعرف أوصفها فكنت بقول أنا جاتلي "الحالة".

الطيران: مشاعر بتجيلي وأنا بمارس skateboarding وهي موجودة في كل الرياضات الخطرة عموما الـ أنا بعشقها .. وهي مزيج من النشوة والحماسة والخوف والأدرينالين والتركيز والعرق والإجهاد والرغبة في الفوز ... مشاعر عظيمة!

حاجة جديدة: مشاعر اني اشتريت حاجة جديدة بحبها وهبدأ أستخدمها لأول مرة! بلاي ستيشن لبس جديد علاقة جديدة مع حد على نفس الموجة ... مشاعر بالبهجة والحماس وشعلة متوهجة جوايا واحساس ان لا نهائي وان انا بتسع وبتمدد في كل اتجاه حوليا ...

التمكن: احساس اني بقيت متمكن من شغل معين بعمله بقالي فترة وكل حاجة بقت ماشية بسلاسة ... احساس ان الواحد برنس كده في نفسه ... احساس البياع الشاطر المتمكن والحرفي الخبير ...

الولا حاجة: مشاعر اللا مشاعر ... حالة سكون ... حالة حضور ... حالة امتزاج لكل شيء .. مفيش حلو ووحش .. في حقيقة أكبر من العقل وأكبر من الكلام انه يستوعبها ... مشاعر بدأت مع ممارسة التأمل وزادت وبقت موجودة دايما في الخلفية ... لكنها أكبر من انها يتقال عليها مشاعر ... هي ممكن تكون الوعاء الموجود جواه كل المشاعر ... أو ساحة الفراغ بين المشاعر المختلفة ...