قانون الجانب الآخر
Jan 10, 2020قانون "الجانب الآخر"
أي حاجة عايز تبيعها في الجانب الآخر في حد بيدور عليها وعايز يشتريها
أي فكرة مشروع خطرت في بالك في الجانب الآخر في ناس موجودين عندهم القدرة المالية وبيدوروا على الفكرة بتاعتك
أي شخص عايز ترتبط بيه عنده مواصفات معينة، في الجانب الآخر الشخص ده موجود وبيدور على مواصفاتك
الفكرة كلها في نقطتين:
1- خلي بالك من نوع رغباتك والأهداف الـ انت بتسعى ليها واتأكد ان الحاجات دي انت فعلا محتاجها مش بتلجأ إليها كنوع من الهروب وخلاص، لأن مش معنى إن الطرف الآخر الـ انت محتاجه موجود يبقى هو كويس ليك .. ممكن ببساطة لو انت عايز تبيع فكرة بنية "نصب على الناس" هيجيلك الشخص الـ يمولهالك وينصب عليك أو حد تالت ينصب عليكم انتو الاتنين أو الفكرة تفشل. ممكن ترتبط بالشخص بالمواصفات الـ انت عايزها لكن بعد ما ترتبطوا بجد تكتشف ان مش هي دي المواصفات المناسبة ليك وتكتشف ان الشخص ده في حاجات تانية انت مش مستحملها لأنها أصلا "موجودة فيك". فراجع دايما رغباتك، وراجع نيتك من الحصول على أي شيء وتحقيق أي هدف، هل نيتك فيها حب ولا خوف؟ هل سعيك للشيء في تروي وملاحظة ولا تسرع واستعجال؟
2- مش محتاج تشغل بالك ان الفرصة هتيجي امتى لأن الفرص دايما موجودة وبتيجي بعدد مرات لا نهائية في العمر، لكن خلي تركيزك كله في إنك تعمل الـ عليك وتكون مستعد لاستقبال الفرصة لما تيجي.
"كل ما تبحث عنه يبحث عنك" كما قال الرومي. "فكن جذابا لما يبحث عنك" كما قال فريديك دودسون 
