مراحل الوعي

مراحل الوعي من منظور جديد

هتكلم عن مراحل الوعي من منظور جديد بسيط ومختلف شوية. هركز فيه على نقاط معينة فقط.

1- اليأس
مرحلة بيكون فيها الشخص يائس ومحبط من كل حاجة، مش شايف أي بريق أمل وعايش كأنه مش عايش، مش حاسس بحاجة .. مشاعر ضبابية وكئيبة، فقدان للمعنى وفقدان للرغبة في أي شيء. بيزق نفسه وخلاص عشان يومه يعدي وطاقته مستنزفقة مش قادر حتى يحط ايده على سبب المشكلة أو يفكر في حل أو في احتمالية إن يكون في حل أو مخرج من الـ هو فيه.

2- الخوف
الشخص في المرحلة دي ممكن يكون بيتحرك وبيشتغل وبيعمل كل حاجة، لكن الخوف هو الـ بيحرك كل أفعاله وأفكاره. بيشتغل عشان خايف ميكونش معاه فلوس وبيحوش عشان خايف يفلس وبيرتبط عشان خايف من الوحدة وبيشغل نفسه بالسوشيال ميديا عشان خايف من الفراغ .. إلخ. قرارات مش متزنة طول الوقت وتوتر وتشتت. معندوش تركيز وطاقته مهدرة في أشياء كتيرة في نفس الوقت، والمشكلة انه مهما عمل من إنجازات وحقق نجاحات الخوف هو الـ بيحركه وبالتالي نتائج أي حاجة بيعملها بيكون فيها مزيد من الخوف والتوتر، وصعب انه يحس بالرضا أو يلاقي وقت يستمتع بحاجة.

3- الإيجابية
بشكل عام بيكون شخص التواجد معاه مريح. طاقته حلوة وبيركز ع الجوانب المشرقة في الحياة وبيحاول على قد ما يقدر انه يحقق حاجات كويسة ويبسط نفسه ويساعد الـ حواليه. شخص كثير السعي ومش بيحبط بسهولة، لو فشل في حاجة بيحاول بطريقة تانية وتالتة، عنده إيمان إن في قوة أكبر بتساعده في حياته وتدعمه، وممكن يكون عنده مخاوف كتير لكن في دايما معتقد إن الأمور هتمشي على ما يرام وهيحقق الـ هو عايزه. الإيجابي شخص مهتم بتطوير نفسه والتعلم في مختلف المجالات وعشان كده بياخد كورسات وبيقرأ ومنفتح ع الحياة.

4- المستنير
المستنير يصعب وصفه لأنه في حتة تانية .. المستنير ارتقى عن كل مراحل الوعي السابقة وبيرى ما لا يراه الناس. عنده نظرة كلية وعميقة وثاقبة للأشياء، يعرف قوانين الحياة ويعيش في تناغم معها. المستنير يعرف رسالته ويؤدي دوره بوعي. المستنير يعيش في نعيم واستمتاع لحظة بلحظة ووجوده بيعمل توازن في الحياة، لما الوعي الجمعي يسيطر عليه الخوف والهلع والغضب، المستنير يظل ثابتا ومتجذرا عشان يفوق الناس، يكشف لهم مخاوفهم ويصحيهم من الأوهام. ولما كل الناس تتخاذل وتتقوقع وترضى بالظلم، المستنير يتحرك ويواجه. المستنير متفرد ولا يتبع انتماءات. الناس لا يفهمونه ودايما بيحاولوا يحصروه في تصنيفات لأن وجوده يربكهم ويعكس لهم المناطق المظلمة في دواخلهم. المستنير أدرك الحقيقة واستيقظ من الحلم، وهو يتقبل الجميع كما هم .. هو يدرك أن الكون خارج عن السيطرة ولا يحاول التحكم في الأحداث. كلماته وأفعاله إلهام تساعد الناس وترشدهم للنور بلطف وحب ووضوح لم يعتد عليه الناس ...

هذه مراحل عامة للوعي بينها درجات. وجدير بالذكر أن المشاعر التي نمر بها في تغير وتقلب وتطور مستمر، لكن توجد مرحلة عامة من الوعي تحرك أفكار الشخص ومشاعره وقراراته وسلوكياته.

فيه تفصيل كتير لكن حبيت أكتب مقال موجز يساعدك تدرك انت في أي مرحلة، عشان تتقبل مرحلتك وتقدر ترتقي للمرحلة التالية بسلاسة ويسر .. وأحب أسمع آراءكم وأسئلتكم وتعليقاتكم عن مراحل الوعي 

#منهج_الاستنارة
#تاو_تي_تشينج
#طريق_الاستنارة