مركبة الجسد
Jan 01, 2021جسمك هو "مركَبتك"
لو انت سواق شاطر ومحترف لكن المركَبة أو العربية بتاعتك فيها عطل كبير .. هتفضل مجرد سواق شاطر في عربية عطلانة مكانها.
لو انت سواق شاطر وعربيتك ممتازة لكن الوقود الموجود فيها جودته رديئة ... أداء العربية هيكون رديء واحتمال الموتور يتأثر ... وهتفضل عربية قوية بوقود وأداء رديء.
ولو العربية قوية وأجزائها ممتازة لكن في شوائب كتير في الموتور بسبب إهمال الصيانة وعدم تغيير الزيت في معاده ... أدائها هيكون ضعيف وهتحصل مشاكل كبيرة.
قد ايه في ناس دلوقتي متبنية أفكار إيجابية وجميلة لكن بيهملوا الجسد ويعتبروه وهم مش موجود! قد ايه في ناس بتحاول ترتقي روحانيا مع تجاهل الاحتياجات الطبيعية للجسد فبالتالي مع الوقت بيحصل لهم اضطراب وعدم توازن. قد ايه هنرتاح لو اهتمينا بجسمنا لأن هو الأساس الـ بتتحرك فيه طاقتنا ومشاعرنا وأفكارنا. الإنسان "الروحاني" المتبني مصطلحات مجعلصة وأفكار سيريالية جميلة، لكنه مهمل للجسد والغذاء الصحي والرياضة هو مجرد سواق شاطر في عربية عطلانة.
الجسد هو المركَبة الـ من خلالها بتتواصل مع العالم المادي بكل تفاصيله وبتعيش رسالتك فيه. احترم جسمك واسمع له واهتم بيه وحبه وافهم قوانينه وعيش في تناغم معاه. وده نقطة البداية الحقيقية لأي ارتقاء حقيقي في الوعي والروحانية ... من غير أوهام ومصطلحات زعنفية ...
#21
