وضع الحدود

صباح النور

الفترة دي بتظهر معايا كتير فكرة الحدود، أنهيت حاجات كانت متعلقة وحطيت حدود لحاجات تانية. وبصراحة الموضوع مريح جدا وضروري نكون واضحين مع نفسنا ومع الآخرين في شوية حدود في حياتنا عشان نرتاح.

-خليك واضح وبلاش مرقعة:
مبقتش أعرف أتعامل في علاقة قريبة سواء علاقة شخصية أو شغل مع حد مش واضح .. مايع .. بيختفي فجأة كل شوية .. نتفق على حاجة وميعملهاش .. غموض مستمر .. مالوش كلمة .. بيعمل عبيط .. متفهملوش .. على طول في حاجة ناقصة مش بتتقال وفي غموض. أي علاقة من النوع ده مبقتش أسمح لها تستمر في حياتي أو ممكن نبقى أصحاب من بعيد لبعيد، بس بصراحة مفيش حاجة تجبرني إني أتعامل باستمرار في علاقة مرهقة بالشكل ده مع ناس مش عارفة هي عايزة ايه أو عارفين ومش بيقولوا أو تايهين أو مش مركزين ... سلامتك يا دماغي.

الوضوح والشفافية هي القيمة الأولى بالنسبة لي في أي علاقة مهمة. ممكن العلاقة تستمر وممكن لا، ممكن يحصل تغيير في شكل العلاقة وممكن لا، ممكن نختلف ونتفق وممكن حاجات كتير بس نكون واضحين مع بعض. خليك راجل كده وكلمني زي ما بكلمك ورد عليا وقول أسبابك .. خليك شجاع ومتبقاش سيس وأنا هحترمك وهقدر قراراتك حتى لو كنت مختلف معاها. الشخص الـ مش بيواجهك ويتهرب باستمرار في الغالب معندوش الشجاعة الكافية إنه يواجه نفسه وبالتالي التعامل معاه هيكون مرهق ومستنزف للطاقة فسلامي الداخلي أهم.

-الـ يقدّرك قدّره والـ يبيعك بيعه:
وده تاني قيمة مهمة بالنسبة لي في العلاقات وهي التقدير. إني أكون متفق مع شخص على معاد ويختفي وميظهرش بدون سبب أو بأعذار فكسانة ويتكرر ده باستمرار، ده شخص مش بيقدر وقتي وبالتالي مش بيحترمني. الشخص ده بيكون أناني ومعندوش فهم واستيعاب لوقت الآخر وظروفه وحياته، هو بيكون أناني لدرجة إنه مش شايف غير نفسه ووقته وممكن يستغرب لو لومته انه اتأخر ومظهرش في معاده! أو شخص ليك حق عنده ومش بيديهولك وبيماطل ويتكاسل ويضطرك انك تطلب حقك أكتر من مرة وتلح عليه ويطلع عينك عقبال ما تاخده. أو شخص يكون عارف إن تصرف معين بيضايقك ويستمر في ممارسته مرة واتنين وتلاتة بدون أي اعتبار أو تقدير لمشاعرك، تاني لأنه أناني مش شايف غير مشاعره وتفكيره هو ومعندهوش أي إدراك لتأثير تصرفاته على مشاعر الآخر. ده شخص البعد عنه غنيمة والتعامل معاه مسألة مرهقة وغير نافعة.

التقدير والاحترام والاحساس بالآخر قيمة جميلة جدا وهي أساس أي علاقة صحية. ومفيش أي سبب يخليني أستمر في علاقة مع شخص مش بيقدرني زي ما بقدره، معادلة فاشلة وأي تعامل في العلاقة دي هيكون مصيره الفشل والابتزاز والإرهاق.

مش بستغرب أوي من وجود ناس معندهاش أبسط قواعد الذوق والتقدير والوضوح والاحترام، لكن الـ بستغرب منه حقيقي هو الناس الـ بتسمح للطرف الآخر يستغلها ماديا ومعنويا ويتمسكوا بعلاقات هم الطرف الخسران فيها من كل الجوانب، ويكونوا شايفين كل ده بوضوح ومع ذلك يلتمسوا الأعذار لشخص معندهوش أي تقدير أو احساس وبالتالي بيسمحوله يتمادى في هذا التصرف ويصبح هو ده العادي بالنسبة لهم! ازاي تسمح لنفسك تستمر في علاقة زي كده؟ للدرجة دي نفسك ملهاش قيمة عندك؟ للدرجة دي مش بتحترم نفسك ولا بتقدرها؟ للدرجة دي وقتك وطاقتك ملهمش أي قيمة؟ ايه النفع المعنوي أو المادي الفظيع الـ بيعود عليك من علاقة سامة زي كده يخليك تستمر وتتمسك بيها وتعيش مبهدل نفسك للدرجة دي؟؟؟!

ولما تكتمل الصورة وتوضح أرجع أقول المستهترين بمشاعر الآخرين ووقتهم وحقوقهم موجودين بسبب المستضعفين الـ مش بيتكلموا وبيسمحوا للآخر يستبدهم ويجرحهم وييجي عليهم وهم ساكتين وخاضعين 

#علاقات_ذهبية
18-20 أكتوبر 2020